जापानको ड्राइभिङ भिसामा आउन चाहनेका लागि नयाँ अवसर, भाषा र सीप भएकालाई बाटो खुल्दै

टोकियो | सेप्टेम्बर २१, २०२६, जापानमा बस चालकको अभाव बढ्दै गएपछि विदेशी नागरिकलाई पनि बस चालकका रूपमा भर्ती गर्ने क्रम सुरु भएको छ। हिरोशिमा प्रिफेक्चरमा रहेको हिरोशिमा कोत्सुले इन्डोनेसियाबाट दुई जना विदेशीलाई बस चालकका रूपमा भर्ती गरी प्रशिक्षण दिइरहेको छ।
कम्पनीका अनुसार हिरोशिमा प्रिफेक्चरमा बस चालकका रूपमा विदेशी नागरिक भर्ती गरिएको यो पहिलोपटक हो। दुवै जनाले जुनदेखि सार्वजनिक सडकमा बस चलाउने प्रशिक्षण सुरु गरेका छन् र वर्षको अन्त्यसम्म नियमित रुटमा यात्रु बोक्ने चालक बन्ने तयारीमा छन्।
हिरोशिमा कोत्सुमा अहिले १९५ जना बस चालक छन्। यो संख्या १० वर्षअघिको तुलनामा करिब २० प्रतिशत कम हो। चालक अभावका कारण कम्पनीले सन् २०२४ मा दुईपटक बस सेवा घटाउनुपरेको थियो।
विदेशी चालक भर्तीका लागि कम्पनीले इन्डोनेसियालाई रोज्नुको एउटा कारण जापानसँग मिल्दोजुल्दो यातायात प्रणाली पनि हो। दुवै देशमा सवारीसाधनको स्टेयरिङ दायाँतर्फ हुन्छ र सडकको बायाँपट्टि सवारी चलाइन्छ।
तर जापानमा बस चालक बन्न विदेशी नागरिकका लागि जापानी ड्राइभिङ लाइसेन्स आवश्यक हुन्छ। इन्डोनेसियाली लाइसेन्सलाई जापानी लाइसेन्समा रूपान्तरण गर्न उनीहरूले व्यावहारिक परीक्षा पनि दिनुपरेको थियो। विशेष प्रशिक्षण लिएपछि दुवै जनाले चौथो प्रयासमा परीक्षा पास गरेका थिए।
यस घटनाले जापानमा ड्राइभिङ सीपसँगै जापानी भाषा जान्ने विदेशीका लागि यातायात क्षेत्रमा रोजगारीका अवसर विस्तार हुन सक्ने संकेत दिएको छ। विशेषगरी जापानमा ड्राइभिङसम्बन्धी कामका लागि आउन चाहने विदेशीका लागि बस चालक क्षेत्र पनि सम्भावित रोजगारीको क्षेत्रका रूपमा देखिन थालेको छ।
यद्यपि, यो समाचारले सबै विदेशीका लागि नयाँ ‘ड्राइभिङ भिसा’ खुलिसकेको भन्ने अर्थ भने दिँदैन। सम्बन्धित भिसा श्रेणी, योग्यता, जापानी लाइसेन्स र रोजगारदाताको आवश्यकताअनुसार छुट्टाछुट्टै नियम लागू हुन्छन्।
हिरोशिमा कोत्सुले भने चालक अभाव समाधान गर्न आगामी दिनमा पनि विदेशी नागरिकलाई बस चालकका रूपमा भर्ती गर्ने योजना जारी राख्ने जनाएको छ।