जापानमा १६ लाखको लाइसेन्स विवरण चुहिएको आशंका! नागरिकमा त्रास, लाइसेन्स फेर्नेको भीड, नेपालीले अब के गर्ने?

टोकियो, अक्टोबर ११। जापानमा कार सेयरिङ सेवा सञ्चालन गर्ने कम्पनीको प्रणालीमा भएको साइबर आक्रमणपछि लाखौँ ग्राहकका व्यक्तिगत विवरण जोखिममा परेका छन्। ड्राइभिङ लाइसेन्सका तस्बिरसहितका विवरण चुहिएको आशंकाले नागरिकमा चिन्ता बढेको छ।
प्राप्त समाचारअनुसार, टाइम्स कार (Times Car) सेवासँग सम्बन्धित साइबर आक्रमणका कारण करिब ६६ लाख सदस्य खातासम्बन्धी विवरण प्रभावित भएका छन्। तीमध्ये करिब १६ लाख व्यक्तिका परिचयपत्रका तस्बिरमा अनधिकृत पहुँच पुगेको आशंका गरिएको छ। यसमा ड्राइभिङ लाइसेन्सका तस्बिरसमेत समावेश छन्।
व्यक्तिगत विवरण दुरुपयोग हुने डर
लाइसेन्समा नाम, जन्ममिति, ठेगानालगायतका व्यक्तिगत विवरण हुने भएकाले ती जानकारी गलत व्यक्तिको हातमा पुगेमा दुरुपयोग हुन सक्ने चिन्ता बढेको छ। आफ्नो पहिचान प्रयोग गरेर कसैले अनधिकृत कारोबार गर्ने वा अन्य सेवा लिने हो कि भन्ने डर सेवाग्राहीमा देखिएको छ।
यस घटनापछि केही व्यक्तिले आफ्नो ड्राइभिङ लाइसेन्स पुनः जारी गराउने विकल्प रोजेका छन्। तर लाइसेन्सको कार्ड परिवर्तन गर्दैमा पहिले नै चुहिएका डिजिटल तस्बिर तथा अन्य विवरण पूर्ण रूपमा हट्ने सुनिश्चित हुँदैन।
जापानमा बस्ने नेपालीले के गर्ने?
जापानमा बसोबास गर्ने नेपालीले पनि आफ्नो व्यक्तिगत विवरणको सुरक्षामा ध्यान दिनु आवश्यक छ। बैंक वा अन्य वित्तीय संस्थाबाट आएको जस्तो देखिने शंकास्पद फोन, इमेल तथा सन्देशबाट सावधान रहनुहोस्। अपरिचित व्यक्तिलाई पासवर्ड, बैंक विवरण वा प्रमाणीकरण कोड नदिनुहोस्।
आफ्नो नाममा नचिनेको कारोबार वा खाता खोलिएको शंका लागेमा सम्बन्धित संस्थालाई तुरुन्त सम्पर्क गर्नुहोस्। व्यक्तिगत विवरण दुरुपयोग भएको आशंका भएमा प्रहरीसँग परामर्श लिन सकिन्छ।