जापानमा विदेशी पर्यटकको ओइरो! जुलाईमा मात्रै ३४ लाख ४० हजार पुगे

टोकियो, जापान — जुलाई महिनामा जापान भ्रमण गर्ने विदेशी पर्यटकको संख्या ३४ लाख ४० हजार पुगेको छ। अघिल्लो वर्षको सोही अवधिको तुलनामा ०.१ प्रतिशतले वृद्धि हुँदै यो संख्या जुलाई महिनाकै लागि अहिलेसम्मकै उच्च बनेको हो।
जापान राष्ट्रिय पर्यटन संगठन (JNTO)ले बुधबार सार्वजनिक गरेको प्रारम्भिक तथ्यांकअनुसार, गर्मीयाम र उत्तरी गोलार्धको बिदाको मौसमसँगै जापान आउने विदेशी पर्यटकको संख्या उच्च स्तरमा कायम रहेको छ।
देश तथा क्षेत्रअनुसार सबैभन्दा धेरै पर्यटक दक्षिण कोरियाबाट आएका छन्। जुलाईमा दक्षिण कोरियाबाट ८ लाख ९४ हजार ७ सय पर्यटक जापान पुगेका छन्, जुन अघिल्लो वर्षको तुलनामा ३१.९ प्रतिशतले बढी हो।
त्यसपछि दोस्रो स्थानमा ताइवान रहेको छ। ताइवानबाट ७ लाख ६३ हजार ८ सय पर्यटक जापान पुगेका छन्। यो संख्या अघिल्लो वर्षको तुलनामा २६.४ प्रतिशतले बढेको र ताइवानका लागि जुलाई महिनाकै नयाँ रेकर्ड बनेको बताइएको छ।
तर चीनबाट आउने पर्यटकको संख्या भने उल्लेख्य रूपमा घटेको छ। जुलाईमा चीनबाट ४ लाख २८ हजार २ सय पर्यटक जापान पुगेका छन्, जुन अघिल्लो वर्षको तुलनामा ५६.१ प्रतिशतले कम हो।
JNTOका अनुसार दक्षिण कोरिया, इन्डोनेसिया र मेक्सिकोसहित १७ वटा बजारबाट जुलाई महिनामा जापान आउने पर्यटकको संख्याले नयाँ रेकर्ड कायम गरेको छ।
जापान पर्यटन एजेन्सीका आयुक्त नोरियो किमुराले विदेशी पर्यटक आउने देशहरू थप विविध बन्दै गएको र आवाससहित विभिन्न क्षेत्रमा पर्यटक खर्च बढिरहेको बताएका छन्।
तर विदेशी पर्यटकले प्रयोग गर्ने निजी आवास अर्थात् ‘मिन्पाकु’ सम्बन्धी समस्या पनि बढ्न थालेको छ। विशेषगरी हल्ला, फोहोर व्यवस्थापन तथा स्थानीय बासिन्दाको जीवनशैलीमा असर पर्ने गुनासो बढ्दै गएको बताइएको छ।
पर्यटन एजेन्सीले स्थानीय समुदायको बसोबासमा नकारात्मक असर नपर्ने गरी यस्ता निजी आवासलाई व्यवस्थित रूपमा सञ्चालन गराउन आवश्यक कदम चाल्ने जनाएको छ।