जुत्तामाथि मोबाइल बाँधेर किशोरीको स्कर्टभित्र भिडियो खिच्ने प्रयास, ५१ वर्षीय पुरुष पक्राउ

टोकियो । जापानको हिरोशिमामा जुत्तामाथि स्मार्टफोन बाँधेर एक किशोरीको स्कर्टभित्र गोप्य रूपमा भिडियो खिच्ने प्रयास गरेको आरोपमा ५१ वर्षीय पुरुष पक्राउ परेका छन्।
हिरोशिमा प्रहरीले ओकायामा प्रिफेक्चरल बोर्ड अफ एजुकेशनमा कार्यरत काजुनोरी मुरातालाई पक्राउ गरेको हो। उनीमाथि एक किशोरीको स्कर्टभित्र गोप्य रूपमा भिडियो खिच्ने प्रयास गरेको आरोप लागेको छ।
प्रहरीका अनुसार घटना अगस्ट १४ तारिख दिउँसो करिब ३ः१५ बजे हिरोशिमा सहरको नाका वार्डस्थित एक सपिङ सेन्टरमा भएको थियो।
मुराताले आफ्नो स्निकर जुत्ताको माथिल्लो भागमा हुक एन्ड लुप फास्टनर (भेल्क्रो) प्रयोग गरी स्मार्टफोन बाँधेका थिए। त्यसपछि उनले जुत्तामा जडान गरिएको मोबाइलको क्यामेरा प्रयोग गरेर किशोरीको स्कर्टभित्र भिडियो खिच्ने प्रयास गरेको प्रहरीको आरोप छ।
घटनास्थलमा रहेका एक सपिङ सेन्टर कर्मचारीले उक्त गतिविधि देखेपछि तत्काल प्रहरीलाई खबर गरेका थिए। त्यसपछि प्रहरीले मुरातालाई पक्राउ गरेको हो।
पक्राउ परेका मुराता ओकायामा प्रिफेक्चरल बोर्ड अफ एजुकेशनअन्तर्गत एक प्रिफेक्चरल हाईस्कुलमा प्रशासनिक कर्मचारीका रूपमा कार्यरत रहेको जनाइएको छ।
घटनापछि ओकायामा प्रिफेक्चरल बोर्ड अफ एजुकेशनको शैक्षिक नीति विभागले विज्ञप्ति जारी गर्दै घटनाप्रति गम्भीर दुःख व्यक्त गरेको छ।
विभागले भनेको छ, “यो घटना अत्यन्तै खेदजनक छ। घटनाको तथ्य पुष्टि गरी कडाइका साथ आवश्यक कारबाही गरिनेछ।”
प्रहरीले घटनाबारे थप अनुसन्धान गरिरहेको जनाएको छ।