१७ वर्षीय छात्रको ज्यान लिने चालक पहिले पनि धेरै दुर्घटनामा संलग्न

टोकियो — जापानको फुकुशिमा प्रिफेक्चरमा स्कुले छात्र बोकेको मिनीबस दुर्घटनामा १७ वर्षीय विद्यार्थीको ज्यान गएपछि चालकको विगतबारे चकित पार्ने तथ्य सार्वजनिक भएको छ। प्रहरीले पक्राउ गरेका ६८ वर्षीय चालक तेत्सुओ वाकायामा यसअघि पनि पटक–पटक सवारी दुर्घटनामा संलग्न रहेको अनुसन्धानबाट खुलेको हो।
बुधबार बिहान बानेत्सु एक्सप्रेसवेमा भएको दुर्घटनामा मिनीबस रेलिङमा ठोक्किएको थियो। बसमा निइगाता शहरको एक उच्च माध्यमिक विद्यालयको छात्र टेनिस टोली सवार थियो। दुर्घटनामा एक विद्यार्थीको मृत्यु हुनुका साथै चालकसहित २० जना घाइते भएका थिए।
अनुसन्धान स्रोतका अनुसार वाकायामाले यस वर्ष मात्रै धेरै ट्राफिक दुर्घटनामा संलग्न भएको इतिहास रहेको छ। अझ गम्भीर कुरा, उनीसँग भाडामा यात्रु बोक्ने आवश्यक लाइसेन्ससमेत नरहेको प्रहरीले जनाएको छ।
प्रहरीले घटनास्थलमा आकस्मिक ब्रेक लगाएको संकेत दिने स्किड मार्क्स नभेटिएको बताएको छ। चालकले भने “गतिको गलत अनुमान” गरेको स्वीकार्दै आफू निदाएको भने अस्वीकार गरेका छन्।
दुर्घटनापछि जापानमा बस चालकको योग्यता, सुरक्षा जाँच र कम्पनीहरूको लापरवाहीमाथि प्रश्न उठ्न थालेको छ। यातायात अधिकारीहरूले बस सञ्चालन कम्पनी कान्बारा टेत्सुदो कम्पनीमा समेत छापा मारेका छन्।