केही हप्तामै इरान कमजोर हुने!”—अमेरिकाको चेतावनी, युद्धले विश्व हल्लियो

पश्चिम एशियामा बढ्दो तनावबीच अमेरिकाले इरानविरुद्धको सैन्य अभियान केही हप्तामै टुंगिने दाबी गरेको छ। अमेरिकी विदेशमन्त्री मार्को रुबियोले स्पष्ट शब्दमा भने—अमेरिकाले स्थल सेना प्रयोग नगरी नै इरानलाई कमजोर बनाउने लक्ष्य हासिल गर्नेछ।
पेरिसमा सम्पन्न जी–७ विदेशमन्त्रीहरूको बैठकपछि बोल्दै रुबियोले चेतावनी दिए, “अबको केही हप्ताभित्रै इरान हालसम्मकै कमजोर अवस्थामा पुग्नेछ।” उनको यो भनाइले विश्व राजनीतिमा नयाँ तरंग ल्याएको छ।
यो द्वन्द्व अमेरिका–इजरायलको संयुक्त आक्रमणपछि चर्किएको हो, जसले इरानको आणविक र मिसाइल क्षमतामाथि ठूला प्रहार गरेको बताइएको छ। त्यसको प्रतिकारस्वरूप इरानले क्षेत्रभरिका अमेरिकी सैन्य अड्डामाथि हमला गर्दै विश्वकै महत्वपूर्ण तेल मार्ग—हर्मुज जलडमरूमध्य—प्रायः बन्द गरिदिएको छ।
यस घटनाले विश्व अर्थतन्त्र नै हल्लिएको छ। कच्चा तेलको मूल्य आकस्मिक रूपमा बढ्दा धेरै देशहरू ऊर्जा संकटको सामना गर्न बाध्य भएका छन्। जी–७ देशहरूले समेत अमेरिकामाथि चर्को दबाब दिँदै युद्ध नियन्त्रण गर्न आग्रह गरेका छन्।
यता अमेरिका भने पछि हट्ने मुडमा देखिँदैन। रुबियोका अनुसार, इरानको कदम रोक्न सहयोगी राष्ट्रहरूसँग मिलेर नयाँ रणनीति बनाइँदैछ, जसमा हर्मुज हुँदै जाने जहाजहरूमा ‘टोल’ लगाउने योजना समेत समावेश छ।