-77.png)
गीत विवाद चर्किएपछि साइबर ब्यूरो पुगे खेम सेन्चुरी, उजुरीकर्तासँग आमनेसामने छलफल
राम्रो पोष्ट
१४ असोज २०८३, बुधवार
राम्रो पोष्ट
१४ असोज २०८३, बुधवार
काठमाडौँ । लोकगायक तथा सर्जक खेम सेन्चुरीको पछिल्लो गीत ‘बाहुन बाजे किन कसेको’ विवादमा परेपछि यो विषय अहिले नेपाल प्रहरीको साइबर ब्यूरोसम्म पुगेको छ।
युट्युबमा सार्वजनिक भएको गीतले बाहुन समुदायलाई होच्याएको आरोप लगाउँदै उजुरी परेपछि साइबर ब्यूरोले गीतका सर्जक खेम सेन्चुरी र उजुरीकर्तालाई बोलाएर छलफल थालेको हो।
साइबर ब्यूरोका प्रवक्ता एसपी दिलीपकुमार गिरीका अनुसार मंगलबार दुवै पक्षलाई बोलाएर छलफल गरिएको थियो। तर, पहिलो चरणको छलफलबाट कुनै निष्कर्ष ननिस्किएपछि बुधबार पनि दुवै पक्षलाई पुनः छलफलका लागि बोलाइएको छ।
उजुरीकर्ताहरूले गीतमा प्रयोग भएका केही शब्दले बाहुन समुदायप्रति अपमानजनक धारणा प्रस्तुत गरेको दाबी गरेका छन्। विशेषगरी गीतमा रहेको ‘खान्छौ कि खान्नौ बंगुरको मासु, लौ खाऊ न त सुँगुरको मासु’ भन्ने पंक्तिप्रति आपत्ति जनाइएको विभिन्न रिपोर्टमा उल्लेख छ।
उजुरीकर्ताले उक्त गीत हटाउन वा आपत्ति जनाइएको अंश संशोधन गर्नुपर्ने माग राखेको बताइएको छ। गीतकार तथा संगीतकारसमेत रहेका सेन्चुरी र उजुरीकर्ताबीचको छलफलपछि गीत संशोधन गर्ने, हटाउने वा अन्य कुनै निष्कर्षमा पुग्ने विषयमा अझै निर्णय भइसकेको छैन।
यसैबीच, गीत सामाजिक सञ्जालमा चर्चामा आएपछि विवाद थप चर्किएको हो। सेन्चुरीले यस विषयमा सार्वजनिक रूपमा आफ्नो धारणा के राख्छन् र साइबर ब्यूरोको छलफलबाट अन्ततः के निष्कर्ष निस्कन्छ भन्ने चासो बढेको छ।
हालसम्म यो विषय छलफलकै चरणमा रहेको र कुनै अन्तिम कानुनी निर्णय भइनसकेको छ।
-88.jpg)
