एनआरएनए एकता महाधिवेशनबाट महेश श्रेष्ठको नेतृत्वमा नयाँ कार्यसमिति सर्वसम्मत, डा.बद्री केसी सहित संस्थापकको महाधिवेशन अक्टोबरमा

टोकियो— जापानमा व्यवसाय गर्दै आएका महेश श्रेष्ठको अध्यक्षतामा गैरआवासीय नेपाली संघ अन्तर्राष्ट्रिय समन्वय परिषदको नयाँ कार्यसमिति सर्वसम्मत रुपमा चयन गरेको छ ।

मे ३ र ४ तारिख गैरआवासीय नेपाली संघको उच्चस्तरीय समितिद्वारा काठमाडौंमा आयोजित एकता महाधिवेशनले श्रेष्ठको नेतृत्वमा नयाँ कार्यसमिति निर्विरोध चयन भएको घोषणा गरेको हो ।

चुच्चेपाटी स्थित पाँचतारे हायात होटलमा श्रेष्ठको नेतृत्वमा एनआरएनएको नयाँ कार्यसमिति सर्वसम्मत घोषणा गरिरहँदा सो महाधिवेशनमा गैरआवासीय नेपाली संघ अन्तर्राष्ट्रिय समन्वय समितिको ११ औं महाधिवेशनबाट निर्वाचित डा.बद्री केसी र उनको कार्यसमिति, संस्थापक अध्यक्ष उपेन्द्र महतोसहितका संस्थापकको सहभागिता र संलग्नता रहेन् ।

केसी पक्षले आफ्नो कार्यसमितिको पदावधि ०८२ कात्तिक ४ गतेसम्म रहने दाबी गरेको छ । यसलाई नै आधार मानेर केसी पक्ष एकताको विशेष महाधिवेशन र नियमित महाधिवेशन एकसाथ गर्नुपर्ने अडानमा छ ।

केसी पक्षको कार्यसमितिले १२ औं अन्तर्राष्ट्रिय महाधिवेशन तथा विश्व सम्मेलन अक्टोबर ११ देखि १४ सम्म काठमाडौंमा गर्ने निर्णय गरेको छ ।

सर्वोच्च अदालतबाट २०८० चैत २१ गते सर्वोच्च अदालतका न्यायाधीशद्वय सपना प्रधान मल्ल र नहकुल सुवेदीको संयुक्त इजलासले सम्पूर्ण गैरआवासीय नेपालीको साझा संस्थाका रूपमा रहेको एनआरएनमा उत्पन्न सम्पूर्ण गतिरोधलाई निकास दिन भन्दै शेष घलेको नेतृत्वको उच्चस्तरीय समिति ब्युँताइएको थियो।

एनआरएनएको १० औं महाधिवेशनको प्रतिनिधि चयनमा विवाद भएपछि २०७८ माघ १ गते तत्कालीन अध्यक्ष कुमार पन्तको अध्यक्षतामा बसेको ८१ औं बैठकले तत्कालीन संरक्षक शेष घलेको संयोजकत्वमा उपेन्द्र महतो, जीवा लामिछाने, देवमान हिराचन, भवन भट्ट, रामप्रताप थापा र कुमार पन्त रहेको ७ सदस्यीय उच्चस्तरीय समिति गठन गरेको थियो । यसलाई नै अदालतले ब्युँताइदिएको थियो ।

ब्युँताइएको शेष घले नेतृत्वको उच्चस्तरीय समितिले बद्री केसि समुहले तय गरेको समयभन्दा करिब ५ महिना अगावै यो महाविधेशन गराएर हो।  

घलेको नेतृत्वको उच्चस्तरीय समितिको एकताको महाधिवेशनले श्रेष्ठको नेतृत्वमा नयाँ कार्यसमिति सर्वसम्मत रूपमा चयन गरेको छ ।

नयाँ कार्यसमितिको उपाध्यक्षहरू क्रमशः खगेन्द्र न्यौपाने, लोकप्रसाद दाहाल, सुनिलकुमार शाह, मनोजकुमार श्रेष्ठ, विश्वासदीप लिम्बू, बुद्धिसागर सुवेदी र जानकी गुरुङ चयन भएको प्रमुख निर्वाचन आयुक्त गोपालकृष्ण घिमिरले जानकारी दिनुभयो।

त्यस्तै महासचिवमा बाबुराम लामा, सचिवमा क्रमशः टंकप्रसाद गैरे, चिन्तामणि सापकोटा, तिलकप्रसाद गैरे र देवकी खत्री गुरुङ निर्वाचित भएका छन् । कोषाध्यक्षमा ठाकुरप्रसाद ढुङ्गाना, सहकोषाध्यक्ष माकृष्णप्रसाद पोखरेल, महिला संयोजकमा रश्मी थापा, युवा संयोजकमा भीमसेन थापा चयन भएका छन् ।

त्यस्तै महाधिवेशनले क्षेत्रीय संयोजक र उपसंयोजक पनि चयन गरेको छ । जसमा एसिया प्रशान्तको संयोजक डा.बलराम श्रेष्ठ, युरोपमा प्रेमबहादुर गुरुङ, मध्यपूर्वमा रमेश श्रेष्ठ, उत्तरदक्षिण अमेरिकामा ढिलुराम पराजुली, ओसियानामा इर्सद अहमद रहेका छन् ।

एकता महाधिवेशनको उद्घाटन गर्दै परराष्ट्रमन्त्री आरजु राणा देउवाले सर्वोच्च अदालत र परराष्ट्र मन्त्रालयको निर्णय अनुसार नै गैरआवासीय नेपाली संघको एकता महाधिशेन भएको बताएकी छन् ।

‘हामीलाई एउटै मात्रै एनआरएनलाई चिन्छौं । मेरो मन्त्रालयले यसलाई नै गर्छ,’ उनले भनिन्,‘सबै यसमा नै जोडिनुस । अलग अलग हुँदैन । यो नै आधिकारिक हो।’